سائق التوكتوك انتحر بسببى

والله ماليا ذنب فى اللى حصل للشاب ده






أنا كنت أصلا بقوله ...................






بقولكم إيه ماتيجى نعرف القصه من أولها





مش عارف ليه لما بركب وصيله مواصلات وخصوصا التوكتوك بحب أتكلم مع السواق



مع إن أم حبيبه يومها إترجتنى بالله عليك يا أحمد أسكت



حاولت مقدرتش



كنا راجعين من سمنود لقريتنا اللى تبعد 3 كيلو عن سمنود



والشاب ده فرحان ومبسوط أوى ........ ياعينى عليه



لسه التوكتوك جديد بقى وبيحاول يجمع قسطه الشهرى




وفرحان ومقبل عالحياه أوى وبيقولى



والله يا أستاذ إحنا حالنا أحسن من غيرنا




أم حبيبه تبصلى وتترجانى أسكت


قلتله أه الحمد لله





قالى تانى




يعنى والله الراجل ده كويس أوى وإبنه برده لما يحكمنا هاتبقى أحسن بكتير




اللهم طولك ياروح يابنى أسكت بقى



أقولكم الحق هنا بقى ومقدرتش أسكت



بدأ بقى يحكيلى عن التوكتوك والمصاريف




وإنه بيجيب كل أسبوع فرخه له ولزوجته





قلتله لا فراخ إيه ياعم إنت ماتعرفش إنفلونزا الطيور


الواد سهم كده وسكت





قالى والله معاك حق أقولك هاشترى لحمه بقى وخلاص




قلتله لحمه إيه بس اللى الكيلو ب 50 جنيه وكمان بلاش علشان الحمى القلاعيه



الواد نسى إنه سايق وبدأ يتأمل فى الدنيا حواليه




قالى ونبره صوته أقرب للبكاء



طيب يا أستاذ الفراخ المثلجه مش أحسن بقى ولا إنفلونزا ولا حاجه


الفيروس بيموت من الطبيخ والحراره العاليه


:> :> :>

كل ده وأم حبيبه بتترجانى أسكت بقى الله يكرمك



الله مش واحد لازم أنوره وأعرفه اللى بيدور حواليه



قلتله مثلجه إيه بس يابنى

إنت عاوز تموت هدر


أما كنا شغالين فى المينا وإحنا بنتدرب

جات سفينه عليها أطعمه جايه من أوروبا واحد مستوردها وهايبيعها هنا


طبعا كمراقبين صحيين لازم ناخد منها عينات


لقينا صاحب البضاعه ( المستورد ) جاى بسيارته 20 متر وخرج من شنطه العربيه


صندوق فيه بضاعه زى اللى مستوردها وأعطاها لكبير المراقبين وقاله


دى اللى هاتتحلل يا باشا


هنا وكانت مقاومه السواق للبكاء بدأت فى الإنهيار



قالى بص بقى





هو السمك مفيش أحلى منه ولا تلوث ولا بتاع



قلتله جاتك خيبه


ما مخلفات المصانع فى النيل






قالى سمك البحر


قلتله مخلفات السفن



قالى بص بقى




هاكل عيش حاف والله مش عاوز لا لحمه ولا فراخ ولا حتى سمك



قلتله عيش إيه يابنى القمح اللى جاى من بره متسرطن






بيقولى كفايه عليا الميه اشربها إرحم أمى بقى منك لله




قلتله والله يابنى أنا مش عاو أعقدك أنا مراقب صحى


ميه النيل بيدخل عليها الصرف الصحى

والميه الجوفيه مختلطه بميه المجارى





الواد بصلى كده ووقف التوكتوك وقالى





أستاذ بيت حضرتك فين أوصلك بسرعه وأرجع التوكتوك لصاحبه وأشوف لى قبر مفتوح

أترمى فيه منك لله يا ...................................




طبعا عارفين مكان النقط مين

مش أنا طبعا





الموضوع ده فعلا حصل بجد والله السواق قالى كده وده حوار دار بينا



السؤال بقى

هو أنا السبب إنى عقدته ولا أنا فعلا سوداوى

عليا يعنى أسيب الراجل ياكل ويموت هدر